Gras ak sipò ak ankadreman lidèchip tankou Olivier Barrau, atlèt ayisyen Jésumène Colin ak Andelson Desirin reyalize yon gwo koudjwe nan Maraton Santo Domingo a apre yo te fin briye nan Maraton Okay la, kote yo mete drapo Ayiti a byen wo sou sèn entènasyonal la.
Apre bèl pèfòmans yo te bay nan Maraton Okay la, atlèt ayisyen Jésumène Colin ak Andelson Desirin te reprezante Ayiti avèk anpil diyite nan Maraton Santo Domingo a. Olivier Barrau, ki toujou ap ankouraje jèn talan yo, pa t kache kontantman li devan gwo rezilta sa yo. Li te eksprime piblikman fyète li pou de reprezantan sa yo ki fè drapo peyi a flote byen wo.
Pandan kous la, Jésumène Colin te fè yon demonstrasyon fòs estrawòdinè kote li te monte sou podiyòm nan nan twazyèm plas (3yèm plas). Bò kote pa l, Andelson Desirin te bay tout li menm pou l te ka dekwoche yon bèl senkyèm plas (5yèm plas). Se yon double istorik ki montre klèman tout potansyèl jèn atlèt nou yo genyen lè yo jwenn bon jan ankourajman.
Pou Olivier Barrau, gwo siksè sa a se pa yon azar, men se rezilta dirèk travay di, disiplin ak detèminasyon san fay de atlèt yo. Li te profite okazyon sa a pou l voye yon gwo bravo pou yo, pandan l ap souliye jan yo fè peyi a fyè. Sipò lidè parèy li enpòtan anpil pou kontinye pouse espò ayisyen an pi devan.
